Fiskeldisfyrirtækið Háafell fékk fóðurprammann Kambsnes afhentan í gær á Ísafirði en fóðurpramminn verður notaður við fiskeldisstöð félagsins í Álftafirði.

Pramminn er merkilegur fyrir þær sakir að hann er búinn öflugum rafhlöðum sem draga verulega úr notkun jarðefnaeldsneytis en gera má ráð fyrir allt að 40-60% olíusparnaði. Auk rafhlaðna er pramminn með búnað til að taka við rafmagni með sæstreng sem hægt verður að nýta í náinni framtíð.

Þetta er annar fóðurprammi félagsins en pramminn Ögurnes í Skötufirði er tengdur við raforkukerfið með sæstreng sem dregur alveg úr notkun á jarðefnaeldsneyti.

Við óskum Háafelli til hamingju með Kambsnes og ánægjulegt að sjá fyrirtæki fjárfesta í lausnum sem draga verulega úr losun.